རྟགས་ཀྱི་འཇུག་པའི་རྩ་བ།
རྒྱ་གར་སྐད་དུ། ལིངྒཱ་ཨ་བ་ཏཱ་ར་ནཱམ། བོད་སྐད་དུ། རྟགས་ཀྱི་འཇུག་པ་ཞེས་བྱ་བ།
སྨྲ་བའི་དབང་ཕྱུག་ལ་ཕྱག་འཚལ་ལོ།།
སྨྲ་བའི་སྐྱེས་མཆོག་སྨྲ་བའི་རྒྱལ།།
ཐམས་ཅད་མཁྱེན་ལ་ཕྱག་འཚལ་ལོ།།
ཕོ་ཡིག་ཡི་གེ་འབའ་ཞིག་ལ།།
སྡེ་པ་ཕྱེད་དང་བརྒྱད་གནས་པའང༌།།
སྡེ་ཚན་ལྔ་རུ་དྲིལ་བྱས་ནས།།
ཡི་གེ་སུམ་བཅུ་ཐམ་པ་ལ།།
ཕོ་དང་མ་ནིང་མོ་དང་ནི།།
ཤིན་ཏུ་མོ་དང་བཞི་བཞི་རུ།།
སྡེ་བ་བཞི་པ་ཡན་ཆད་དབྱེ།།
ལྷག་མ་བཅུ་བཞི་གནས་པ་ལ།།
ཅ་སོགས་གསུམ་ནི་ཅ་སོགས་སྦྱར།།
ཝ་ནི་བ་དང་སྦྱར་བར་བྱ།།
ལྷག་མ་དྲུག་ནི་མོ་རུ་སྦྱར།།
ར་ལ་ཧ་ནི་མོ་གཤམ་སྟེ།།
མ་ནིང་མཚན་མེད་ཅེས་ཀྱང་བྱ།།
མོ་ཡི་ཡི་གེ་ནང་ནས་ནི།།
འཇུག་པའིཡི་གེ་བཅུ་དབྱུང་བྱ།།
འཇུག་པ་བཅུ་ཡི་ནང་ནས་ནི།།
སྔོན་འཇུག་ཡི་གེ་ལྔ་དབྱུང་བྱ།།
སྔོན་འཇུག་ཡི་གེ་ལྔ་པོ་ལ།།
ཕོ་དང་མ་ནིང་མོ་དང་ནི།།
ཤིན་ཏུ་མོ་དང་བཞི་རུ་དབྱེ།།
སྡེ་བ་བཞི་པ་ཡན་ཆད་དབྱེ།།
དེ་དག་རེ་རེའང་བཞི་བྱེད་དེ།།
གང་གིས་འཇུག་བྱེད་གང་ལ་འཇུག།
ཇི་ལྟར་འཇུག་བྱེད་ཅི་ཕྱིར་འཇུག།
གང་ལ་འཇུག་པར་བྱེད་ཅེ་ན།།
ཕོ་ནི་ཕོ་དང་མོ་ལ་འཇུག།
མོ་ནི་མོ་དང་མ་ནིང་ལ།།
ཤིན་ཏུ་མོ་ནི་མ་ནིང་དང༌།།
མོ་དང་ཤིན་ཏུ་མོ་ཉིད་ལའོ།།
མི་འཇུག་པ་ནི་འདི་ལྟར་ཏེ།།
ཕོ་ནི་མ་ནིང་ལ་མི་འཇུག།
མོ་ནི་ཕོ་ལ་འཇུག་མི་འགྱུར།།
མ་ནིང་རང་ལ་རང་མི་འཇུག།
རང་གི་སྡེ་དང་ཕྲད་པ་ན།།
ཕོ་ཡང་མོ་ལ་འཇུག་མི་འགྱུར།།
མ་ནིང་མོ་ཡང་དེ་བཞིན་ནོ།།
ཇི་ལྟར་འཇུག་བྱེད་ཅེ་ན།།
ཕོ་ནི་དྲག་པོའི་ཚུལ་གྱིས་འཇུག།
མ་ནིང་རན་པར་འཇུག་པ་ཡིན།།
མོ་ནི་ཞན་པའི་ཚུལ་གྱིས་ཏེ།།
ཤིན་ཏུ་མོ་ནི་མཉམ་པས་སོ།།
ཅི་ཕྱིར་འཇུག་པ་བྱེད་ཅེ་ན།།
ཕོ་ནི་འདས་དང་གཞན་བསྒྲུབ་ཕྱིར།།
མ་ནིང་གཉིས་ཀ་ད་ལྟ་ཆེད།།
མི་ནི་བདག་དང་མ་འོངས་ཕྱིར།།
ཤིན་ཏུ་མོ་ནི་མཉམ་པས་སོ། །
རྗེས་འཇུག་ཡི་གེ་བཅུ་པོ་ལ། །
ཕོ་མོ་མ་ནིང་གསུམ་དུ་དབྱེ། །
ཕོ་ལ་སྐྱེས་བུ་རབ་འབྲིང་གསུམ། །
མོ་ལ་མོ་དང་ཤིན་ཏུ་མོ། །
མ་ནིང་འགྱུར་དང་མཚན་གཉིས་དང༌། །
མཚན་མེད་ན་ནིང་གསུམ་དུ་འདོད། །
དེ་ཡང་བྱེད་པ་བཞི་བྱེད་དེ།།
གང་ལ་འཇུག་བྱེད་གང་གིས་བྱེད།།
ཇི་ལྟར་འཇུག་བྱེད་ཅི་ཕྱིར་འཇུག།
གང་ལ་ཡི་གེ་ཐམས་ཅད་ལ།།
གང་གིས་བཅུ་པོ་དེ་དག་གིས། །
ཇི་ལྟར་རྣམ་པར་གཉིས་ཡིན་ཏེ། །
སྒྲ་ཡི་འཇུག་ཚུལ་དོན་གྱི་ཚུལ། །
ཕོ་གསུམ་མོ་གཉིས་མ་ནིང་གསུམ། །
དྲག་ཞན་བར་མ་གསུམ་དུ་འཇུག།
དྲག་པ་གསུམ་གྱི་ནང་ཕྲད་དམ། །
གལ་ཏེ་ཞན་པ་ནང་ཕྲད་ན། །
དེ་ལའང་ནང་གི་ཆ་ཤས་ཀྱིས། །
དེ་ཡང་དྲག་ཞན་གཉིས་སུ་དབྱེ། །
མ་ནིང་གསུམ་དུ་གང་གཏོགས་པ། །
དྲག་དང་ཕྲད་ན་དྲག་པར་འགྱུར། །
ཞན་དང་ཕྲད་ན་ཞན་པར་འགྱུར། །
གཉིས་ཀ་དག་དང་ཕྲད་གྱུར་ན། །
དེ་ནི་གཉིས་ཀ་ཅན་དུ་འགྱུར། །
གཉིས་ཀ་དག་དང་མ་ཕྲད་ན། །
གང་དུ་ཡང་ནི་མི་འགྱུར་རོ། །
དེ་ནི་སྒྲ་ཡི་འཇུག་ཚུལ་ལོ། །
དོན་ནི་རྣམ་པར་གཉིས་ཡིན་ཏེ། །
སྔ་མ་གང་ལྟར་འགྱུར་བ་དང༌། །
ཕྱི་མ་གང་ལྟར་འགྱུར་བའོ། །
སྔ་མ་སྔོན་འཇུག་ལྔ་བཞིན་སྦྱར།།
ཕྱི་མ་དག་གི་འདྲེན་ཚུལ་ནི། །
ཕོ་ཡིས་ཕོ་ཡིག་མིང་མཐར་དྲངས། །
མོ་ཡིས་མོ་ཡིག་མིང་མཐར་དྲངས། །
མ་ནིང་གིས་ནི་མ་ནིང་ངོ༌། །
དེ་ཉིད་རང་གི་སྒྲ་མཐུན་པའི། །
ཆོས་དངོས་ལས་དང་བྱེད་པ་དང༌། །
སྦྱིན་དང་འབྱུང་ཁུངས་འབྲེལ་བ་དང༌། །
གནས་དང་བོད་པའི་སྒྲ་ཡང་དྲང༌། །
གཞན་ཡང་སླར་བསླུ་ལྷག་བཅས་དང༌། །
འབྱེད་སྡུད་བསྣན་དང་བདག་པོ་དང༌། །
དགག་སྒྲུབ་རྒྱན་དང་དུས་ལའང་འཇུག།
དེ་དག་སྔ་ཤུགས་འདྲེན་པས་འབྱུང༌། །
དེ་དག་ནང་གསེས་གང་འཇུག་པ། །
མཐར་སྦྱར་འོག་མའི་མིང་དོན་ལས། །
སྤྱི་འཇུག་ཡོད་དམ་བྱེད་པ་ཡོད། །
དེ་བཞིན་ཆེད་བྱེད་རྟེན་བྱེད་དང༌། །
ལས་བྱ་བླང་བྱ་བསྒྲུབ་པར་བྱ། །
སྔོན་དུ་འོས་པ་གནས་པའམ། །
གཞན་ཡང་ཚིག་དོན་གོང་འོག་ཏུ། །
བསྡུ་རྒྱུ་ཡོད་དམ་མེད་པ་དང༌། །
གོང་མ་ལས་ཀྱང་དེ་བཞིན་ཏེ། །
རྣམ་གྲངས་དག་ནི་བཀོད་པ་ལས། །
བསྐྱར་བ་ཡོད་དམ་མེད་པ་དང༌། །
ཕོ་སྒྲ་དང་ནི་མོ་སྒྲ་དག །
མིང་གི་མཐའ་ན་ཡོད་མེད་དང༌། །
རྒྱན་དུ་གྱུར་བ་རྣམ་ལ་ཡང༌། །
དོན་ལ་སྙེག་པ་ཡོད་མེད་དང༌། །
བསྟན་བྱ་ལྷག་མ་ཡོད་མེད་དང༌། །
ཚིག་དོན་རྫོགས་དང་མ་རྫོགས་ཀྱིས། །
དེ་དག་ནང་གསེས་རྣམ་པར་དབྱེ། །
ཅིའི་ཕྱིར་འཇུག་པ་བྱེད་ཅེ་ན།།
ཡི་གེའི་ཁོང་ནས་མིང་དབྱུང་སྟེ།།
མིང་གི་ཁོང་ནས་ཚིག་ཕྱུང་ནས།།
ཚིག་གིས་དོན་རྣམས་སྟོན་པར་བྱེད།།
མོ་ཡི་ཡི་གེ་མེད་པ་ན།།
ཕོ་ཡིག་བརྗོད་པ་མེད་པར་འགྱུར།།
ཕོ་ཡིག་དེ་དག་རྣམས་ལ་ཡང༌།།
འཇུག་པ་བཅས་པ་མེད་པ་ན།།
མིང་དང་ཚིག་ཀྱང་གསལ་མི་ནུས།།
མིང་ཚིག་གསལ་བ་མེད་ན་ནི།།
དོན་རྣམས་བརྗོད་པ་མི་འགྱུར་རོ།།
དེ་ལྟར་གྱུར་ན་འཇིག་རྟེན་ན།།
དོན་མཚོན་བརྗོད་པ་ཀུན་ཀྱང་མེད།།
རིག་བྱེད་སྨྲ་བའང་ཡོད་མི་འགྱུར།།
ཉན་ཐོས་རང་རྒྱལ་སངས་རྒྱས་ཀྱི།།
བསླབ་པ་རྣམས་ཀྱང་མེད་པར་འགྱུར།།
ཇི་ལྟར་འཇིག་རྟེན་སེམས་ཅན་དག།
ཕུང་པོ་ཁམས་དང་སྐྱེ་མཆེད་དང༌།།
གྲུབ་མཐའ་གཞན་ཡང་ཡོད་མོད་ཀྱང༌།།
རང་ཉིད་ཀྱིས་ནི་མི་ཤེས་བཞིན།།
དེ་བཞིན་ཡི་གེ་འཇུག་ཚུལ་རྣམས།།
སྨྲ་བ་ཀུན་ལ་གནས་གྱུར་ཀྱང༌།།
རང་ཚུལ་དེ་དག་མི་ཤེས་པས།།
དོན་གྱི་སྦྱོར་བ་ག་ལ་ཤེས།།
དེ་ཕྱིར་སྨྲ་བའི་དབང་ཕྱུག་གི།
རྗེས་སྨྲས་འདི་ཀུན་རྟོགས་གྱུར་ཅིག།
བྱཱ་ཀ་ར་ཎའི་རྩ་བ་བརྒྱད་པ་ལས་ཀུན་ཏུ་བཟང་པོའི་བྱཱ་ཀ་ར་ཎཱ་གཉིས་པའི་སྐབས་ཏེ་དྲུག་པའོ།།
།།
No comments:
Post a Comment