བོད་ཀྱི་བརྡ་སྤྲོད་སུམ་རྟགས་གཞུང་ལས་ད་དྲག་གི་སྐོར་ལ་དཔྱད་པའི་བློ་གསལ་བུང་བའི་སྒྲ་དབྱངས།
ཐོན་མིའི་རྒྱ་མཚོ་ཕྱག་གིས་བསྲུབ་པ་ལས། །
བྱུང་བའི་བརྡ་སྤྲོད་རིག་པའི་རྣམ་གཞག་གི །
གཞུང་ལས་བཏུས་ཏེ་ད་དྲག་ས་དྲག་སྐོར། །
དཀའ་གནད་བསྲེད་དཀྲོལ་ལས་ལ་འཇུག་པར་བྱ། །
ཞེས་དམ་བཅའ་སྔོན་དུ་གཏོང་ནས་ད་དྲག་སྐོར་ལ་ཅུང་ཟད་ཅིག་དཔྱད་པ་བྱའོ།
སློབ་དཔོན་ཐོན་མིས་ད་དྲག་དགོས་དབང་མཛད། །
གསར་བཅད་སྐབས་སུ་ད་དྲག་ཕལ་ཆེ་བསྡུས། །
ད་དྲག་བསྡུས་ནས་ལེགས་ཆ་ཡོད་ཀྱང་ཟེར། །
ད་དྲག་བསྡུས་པས་རྙོག་འཛིང་ཆེ་སོང་ཟེར། །
ཞེས་པ་སྔོན་བྱོན་ལོ་པཎ་དག་གིས་སྐད་ལ་དག་ཐེར་དང་སྐད་གསར་བཅད་གནང་བ་ལེགས་པའི་ཆ་དབྱར་སྐྱེས་རྔ་སྒྲ་སྒྲོགས་པས་ཤ་མོ་སྤང་ལ་བརྡོལ་བ་ལྟར་མང་དུ་ཡོད་མཆིས། མི་ལེགས་པའི་ཆ་ཡང་ཡོད་པ་སྣང་། ད་དྲག་སྐོར་བཤད་པ་ལ་རྩ་བའི་ས་བཅད་བཞིའི་སྒོ་ནས་བཤད་པ་འདོད།
༡༽ ད་དྲག་ཅན་གང་ནས་གསུངས་པའི་ཁུངས་འཚོལ་བ། ༢༽ ད་དྲག་ཅན་ཐོབ་ཁུངས་འཚོལ་བ། ད་དྲག་དགོས་པའི་རྒྱུ་མཚན། ༣༽ ད་དྲག་ཅན་གང་ལ་འཇུག་པ། ༤༽ ད་དྲག་བསྡུས་སྐྱོན་དང་བཅས་སོ།།
དང་པོ། ད་དྲག་ཅན་གང་ནས་གསུངས་པའི་ཁུངས་འཚོལ་བ།
སུམ་རྟགས་གཉིས་ཀྱི་གཞུང་རྩ་བའི་སྐབས་སུ་ཡང་འཇུག་ད་ས་གཉིས་ཀྱི་འཇུག་པ་དངོས་བསྟན་རྩ་བ་མེད་ལ། ཡང་འཇུག་བཤད་པ་མེད་པས། ཐོན་མིས་ཡང་འཇུག་གཉིས་ཀྱི་སྐོར་བཤད་པའི་བསྟན་བཅོས་གཅིག་ཡོད་པ་ངེས་ཞེས་མཁས་པ་རློམ་པ་དག་གིས་འོལ་ཚོད་ཀྱིས་དེ་འདྲ་གསུངས་མང་། བསྟན་བཅོས་བརྒྱད་བརྩམས་ཞེས་རང་རང་སོ་སོའི་ཚད་དཔོག་དང་འོལ་ཚོད་ཀྱིས་སྒོ་ནས་སྔོན་བྱོན་མཁས་པ་ཡིན་ཟེར་དག་གི་དགོངས་ཚོད་བླངས་ནས་དེ་ལྟར་གསུངས་པ་མ་གཏོགས། གཞན་ང་ཚོའི་ད་ལྟ་མཇལ་དུ་མེད། ཡང་གྲགས་སུ། ཤར་རྒྱལ་བ་ཙོང་ཁ་པ་རྗེ་བློ་བཟང་གྲགས་པའི་བླ་མ་ལོ་ཆེན་ནམ་མཁའ་བཟང་པོའི་ ༼འགྲེལ་བ་བསྟན་པའི་སྒྲོན་མེར།༽ བྱྭ་ཀ་ར་ཎའི་རྩ་བ་བརྒྱད་པ་ལས་ཀུན་ཏུ་བཟང་པོའི་བྱྭ་ཀ་ར་ཎ་དང་པོའི་སྐབས་ཏེ་ལྔ་པའོ། ཞེས་སོགས་ལ་ཁུངས་བཅོལ་ནས་ཐོན་མིས་བསྟན་བཅོས་བརྒྱད་བརྩམས་པ་བཞེད། འོན་ཀྱང་ད་ལྟ་མཇལ་དུ་ཡོད་པ་ནི་སུམ་ཅུ་པ་དང་རྟགས་ཀྱི་འཇུག་པའི་གཞུང་ལུགས་འདི་ཉིད་ཡིན། དེས་ན། གནའ་མི་གཏམ་དཔེར། ཆོས་འགོ་བཀའ་བསྟན་དང་། ཆུ་འགོ་གངས་ལ་གཏུགས་དགོས་པ་ལྟར། གཞུང་འདི་གཉིས་པ་བསྟན་བཅོས་བརྒྱད་པོ་གང་ལས་ཕྱུངས་མིན་དང་གཞུང་གཉིས་པོ་ལ་ལེའུ་ག་ཚོད་ཡོད་མེད་སོགས་དགོངས་ཚོད་ལེན་པ་ཙམ་ལས་སུས་ཀྱང་ལུང་རིགས་བདེན་དཔང་བྱེད་ཐབས་བྲལ། གལ་སྲིད་གཞུང་གཉིས་པོའི་འདི་ལས་ཕྱུང་པའམ་འདི་ལ་བཏོན་པ་རེད་ཅེས་ཁུངས་གཏུགས་ས་དང་གཞི་བཅོལ་གང་ལ་གཞི་འཛིན་ས་དེ་རྙེད་ན་བསྟན་བཅོས་གཞན་རྣམས་ཀྱང་རྙེད་སྲིད། ཕྱིས་སུ་མཁས་པ་མིང་འདོགས་པ་ཕལ་ཆེར་གྱི་འགྲེལ་བ་བསྟན་པ་སྒྲོན་མེས་གསུངས་པ་འདི་ཉིད་དཔེ་བཤུས་བྱེད་པ་ཙམ་ལས། གཞུང་འདི་གང་ལའང་ཁུངས་བཅོལ་མིན་སོགས་དཔྱད་པ་ཞིབ་མོའི་ལུགས་སུ་སུས་ཀྱང་གནང་མི་འདུག དཔྱད་བརྗོད་པ་ཕལ་མོ་ཆེའི་འགག་དོགས་ས་འདིའི་རིགས་ལ་སྤྱི་བཤད་ཙམ་དང་ཨ་བཤད་ཡང་བཤད་ཙམ་ལས་དོན་ངོ་མ་འབུར་དུ་ཐོན་པའི་ལེགས་བཤད་ཅིག་བྲིས་པ་ད་བར་མ་མཐོང་ངོ་།།
