བོད་སིལ་བུའི་སྐབས་ནང་བསྟན་དར་རྒྱས་ཤུགས་ཆེ་བྱུང་ཚུལ།

༢༽ བོད་སིལ་བུའི་སྐབས་ནང་བསྟན་དར་རྒྱས་ཤུགས་ཆེ་བྱུང་ཚུལ།

བོད་སིལ་བུའི་སྐབས་སུ་ནང་བསྟན་དར་རྒྱས་ཤུགས་ཆེ་ཕྱིན་ཡོད། དེ་ཡང་བསྟན་པ་སྔ་དར་དང་ཕྱི་དར་གྱི་དུས་མཚམས་ཤེས་དགོས་པ་དེ་གལ་གནད་ཅིག་མཐོང་། དེ་ཡང་རྗེ་དམུ་དགེ་བསམ་གཏན་གྱིས་བརྩམས་པའི་<<བོད་ཀྱི་རིག་གནས་དར་ཚུལ་མདོར་བསྡུས་བཤད་པ་>>ལས། བསྟན་པ་སྔ་དར་དང་ཕྱི་དར་གྱི་དུས་མཚམས་ནི་གླང་དར་མས་བསྟན་པ་མ་བསྣུབས་པའི་སྔོན་ལ་སྔ་དར་དང་། ལྷ་བླ་མ་ཡེ་ཤེས་འོད་ནས་རིམ་བཞིན་བསྟན་པ་དར་བ་དེ་ལ་ཕྱི་དར་ཟེར་ཞེས་དང་། བསྟན་པའི་མེ་རོ་སྨད་ནས་གསོ་པ་ཡིན་གསུངས་པ་ལྟར། འགོས་ལོ་ཙྭ་བ་གཞོན་ནུ་དཔལ་གྱིས་བརྩམས་པའི་<<དེབ་ཐེར་སྔོན་མོ་>>ལས། བསྟན་པ་ཕྱི་དར་རྩ་བ་ཉིད་གང་ཡིན་བཤད་པར་བྱ་སྟེ། དར་མ་འུ་དམ་བཙན་གྱིས་བསྟན་པ་བསྣུབས་པའི་དུས་སུ་དཔལ་ཆུ་བོ་རིའི་སྒོམ་གྲ་ན། གཡོར་སྟོད་ཀྱི་དམར་བན་ཤྭཀྱ་མུ་ནེ་དང་། དྲང་ཆང་མདོའི་གཡོ་དགེ་འབྱུང་དང་། རྒྱ་རབ་པའི་གཙངས་རབ་གསལ་གསུམ་གྱིས་ཀརྨ་ཤ་ཏཾ་ལ་སོགས་པའི་འདུལ་མངོན་གྱི་དཔེ་ཆ་དགོས་པ་རྣམས་སྤྱན་དྲངས་ནས། དང་པོ་སྟོད་མངའ་རིས་ཕྱོགས་དང་། དེ་ནས་ཧོར། དེ་ནས་མདོ་སྨད་སྲོ་གུ་ལུང་དུ་བྱོན་སྐབས་སུ། འབྲོ་སྟག་སྣང་ཁྲི་སུམ་རྗེ་ཞེས་པའི་བློན་པོ་དེས་ཚེ་འཕོས་ནས་ཙོང་ཁ་བདེ་ཁམས་སུ་ཆུ་ཕོ་བྱི་ལ་སྐུ་འཁྲུངས་ཏེ། ལུས་ནར་སོན་ནས་གཙང་རབ་གསལ་གྱིས་མཁན་པོ་བྱས། གཡོ་དང་དམར་གྱིས་སློབ་དཔོན་བྱས་ནས་དགེ་ཚུལ་བསྒྲུབས། མཚན་ཡང་དགེ་བ་རབ་གསལ་དུ་བཏགས་ཞེས་དང་། ཞྭ་སྒབ་པ་དབང་ཕྱུག་བདེ་ལྡན་གྱིས་བརྩམས་པའི་<<སྲིད་དོན་རྒྱལ་རབས་>>ལས། དམར་གཡོ་གཙང་གསུམ་མདོ་སྨད་ཕྱོགས་སུ་བྲོས་ནས་ཡོང་བའི་སྐབས་ལས་དང་སྐལ་བ་ལྡན་པ་བོན་པོ་མུ་གཟུ་གསལ་བྱ་བས་ཐོས་ཏེ་ནང་པར་བལྟར་ཕྱིན་པས་དད་པ་སྐྱེས་ཏེ་རབ་ཏུ་བྱུང་བར་ཞུས་པ་བཞིན་ཚུགས་དང་པོ་དགེ་ཚུལ་སྡོམ་པ་བླངས།

 ཕྱིས་ཐུགས་རབ་ཆེ་བས་བླ་ཆེན་དགོངས་པ་རབ་གསལ་དུ་གྲགས། ད་ནས་དམར་གཡོ་གཙང་གསུམ་དང་རྒྱའི་དགེ་སློང་གཉིས་ཁ་སྐོང་མཛད་དེ་ཚིགས་ཕྱི་མའི་དངོས་པོ་དགེ་སློང་གི་སྡོམ་པ་བཞེས་ནས་བསྙེན་པར་རྫོགས། དེས་ན་མདོ་སྨད་ཕྱོགས་སུ་སྡོམ་རྒྱུད་ཡོད་པ་དབུས་སུ་ཐོས་པ་དང་དད་པ་ཅན་དང་། ལས་འཕྲོ་ཅན་དབུས་གཙང་གི་མི་བཅུ་མདོ་སྨད་དུ་བྱོན་ནས་བླ་ཆེན་ལས་བསྙེན་པར་རྫོགས། དེ་དག་གིས་འདུལ་བའི་ཆོས་མང་དུ་གསན་ནས་མཁས་པར་གྱུར། དེ་ནས་རིམ་བཞིན་སྨད་དུ་འདུལ་བའི་བསྟན་པ་ཆེ་ཆེར་དར་རྒྱས་སུ་གྱུར་བས་སྨད་འདུག་ཅེས་གྲགས་སོ། །དབུས་གཙང་གི་མཁས་པ་མི་བཅུ་སྔ་ཕྱི་བྱས་ནས་ཡར་དབུས་གཙང་དུ་བྱོན་ནས་བསམ་ཡས་སུ་ཕེབས་དུས་ཚེ་ན་ཡེ་ཤེས་རྒྱལ་མཚན་གཤེགས་ཏེ་སྲས་མངའ་བདག་ཁྲི་པས་ཞབས་ཏོག་ཞུས། དེ་ནས་རིམ་བཞིན་ལྡེ་གཙུག་མགོན་ལ་སྲས་ཁོ་རེ་དང་། སྲོང་ངེ་གཉིས་བྱུང་བ་ལས། སྲས་ཁོ་རེ་རབ་ཏུ་བྱུང་སྟེ་མཚན་ལྷ་བླ་ཡེ་ཤེས་འོད་ཅེས་གྲགས། ཡེ་ཤེས་འོད་ཀྱིས་ཞང་ཞུང་གུ་གེར་མཐོ་ལྡིང་གསེར་གྱི་ལྷ་ཁང་བཞེངས། རྗེ་རིགས་ཀྱི་བུ་ལོ་བཅུ་ལས་མར་མི་གཞོན་པ། ཉི་ཤུ་ལས་ཡར་མི་རྒན་པ་མང་པོ་ཁ་ཆེ་ཡུལ་དུ་སློབ་གཉེར་ལ་བཏང་། ལོ་ཙྭ་བ་རིན་ཆེན་བཟང་པོ་དང་། ལེགས་པའི་ཤེེས་རབ་གཉིས་ཀྱིས་སྔགས་ཀྱི་ཆོས་མང་པོ་བསླངས་ཏེ་མངའ་རིས་སུ་བྱོན། ལོ་ཙྭ་བ་འདིའི་བཀའ་དྲིན་ལས་བསྟན་པ་སྔ་དར་ལས་ཕྱིི་དར་གྱི་སྐབས་སུ་བསྟན་པ་དར་ཆེ་བ་བྱུང་ཞེས་གྲགས། 

གཞན་ཡང་ལྷ་བླ་མ་ཡེ་ཤེས་འོད་ཀྱིས་རྒྱ་གར་ནས་པཎྜི་ཏ་དྷ་རྨ་པ་ལ་སོགས་པའི་པཎྜི་ཏ་དུ་མ་སྤྱན་དྲངས་ནས་སྟོད་འདུལ་གྱི་སྲོལ་གཏོད་པའི་མེ་རོ་སྨད་ནས་གསོས་ཏེ་སྟོད་ནས་འབར་བ་ཞེས་གྲགས་སོ།། <<དེབ་ཐེར་སྔོན་པོ་>>ལས་ཀྱང་དེ་དང་མཚུངས་པ་གསུངས་ལ། གཞན་ཡང་ལྷ་ལྡེའི་རིང་ལ་སུ་བྷྰུ་ཏི་ཤྲྰི་ཤཱ་ནྟི་སྟེ། ཁ་ཆེ་པཎ་ཆེན་དུ་གྲགས་པ་དེ་སྤྱན་དྲངས་ནས། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་དང་། དེའི་འགྲེལ་ཆེན་དང་། མངོན་པར་རྟོགས་པའི་རྒྱལ་འགྲེལ་དང་བཅས་པ་ལ་སོགས་པ་ཕ་རོལ་ཏུ་ཕྱིན་པའི་མདོ་དང་བསྟན་བཅོས་མང་དུ་བསྒྱུར། ལོ་ཆེན་གྱི་སློབ་མ་ལོ་ཙྭ་བ་མཆོག་ཏུ་མཁས་པ་མང་དུ་བྱུང་བ་རྣམས་ཀྱིས་འདུལ་བའི་སྡེ་སྣོད་མང་པོ་དང་། ཕ་རོལ་ཏུ་ཕྱིན་པ་དང་། སྔགས་ཀྱི་ཆོས་ཀྱང་མང་དུ་བསྒྱུར། ཁྱད་པར་རྨ་དགེ་བའི་བློ་གྲོས་ཀྱིས་ཚད་མ་རྣམ་འགྲེལ་དང་། དེའི་རང་འགྲེལ་དང་། ལྷ་དབང་བློའི་འགྲེལ་པ་དང་། ཤྰཀྱ་བློའི་འགྲེལ་བཤད་ལ་སོགས་མང་དུ་བསྒྱུར་ཞིང་། འཆད་ཉན་གྱིས་གཏན་ལ་ཕབ། དེ་ལས་མཆེད་ནས་དབུས་གཙང་གི་ཕྱོགས་འདིར་ཡང་ཚད་མའི་འཆད་ཉན་བྱུང་ཞིང་། དེའི་ཚེ་ཁྱུང་པོ་གྲགས་སེ་ཞེས་བྱ་བ་མཁས་པ་གྲགས་པ་དེས་ཚད་མའི་བཤད་པ་མང་དུ་མཛད། དེ་དག་ལ་ཚད་མ་རྙིང་མ་དང་། ཕྱིས་ལོ་ཙྭ་བ་བློ་ལྡན་ཤེས་རབ་ནས་ཚད་མ་གསར་མར་གྲགས་པ་རྣམས་བྱུང་ངོ་།། དེ་ནས་སྲས་ཆུང་བ་ལྡེ་གཙུག་མགོན་ལ་སྲས་སྲོང་ངེ་དང་འཁོར་རེ་གཉིས་འཁྲུངས་ཤིང་། སྲས་སྲོང་ངེས་དང་ཐོག་རྒྱལ་པོ་གནང་ནས་བཙུན་མོ་བཞེས། སྐུ་ཚེ་སྨད་དུ་རབ་ཏུ་བྱུང་སྟེ་མཚན་ལ་ལྷ་བླ་མ་ཡེ་ཤེས་འོད་ཅེས་གསོལ། ཁོང་གི་མངའ་རིས་སུ་མཐོ་ལྡིང་དཔལ་གྱི་གཙུག་ལག་ཁང་གསར་བཞེངས་མཛད་ཅིང་ལོ་ཙྭ་བ་རིན་ཆེན་བཟང་པོ་དང་རྔོག་ལེགས་པའི་ཤེས་རབ་སོགས་བོད་ཀྱི་གཞོན་ནུ་བློ་རིག་གསལ་བ་ཉི་ཤུ་ལྷག་རྒྱ་གར་དུ་ཆོས་སློབ་པར་བཏང་ནས་བསྟན་པ་ཕྱི་དར་གྱི་དབུ་བསླངས་ཤིང་། སྒོས་སུ་འཕགས་ཡུལ་གྱི་པཎ་གྲུབ་དུ་མ་གནད་དྲངས་ཏེ་རྒྱུད་སྡེ་བཞིས་མཚོན་པའི་བཀའ་བསྟན་གྱི་གཞུང་བསྒྱུར་ཅིང་གཏན་ལ་ཕབ་ཏེ་འདུལ་བ་སྟོད་ལུགས་བྱ་བ་དར་བ་དེ་ལ་སྟོད་འདུལ་ཟེར། ཕྱིས་ཇོ་བོ་ཨ་ཏི་ཤ་སྟེ་དཔལ་ལྡན་མར་མེ་མཛད་གདན་འདྲེན་ཞུ་ཆེད་དུ་གར་ལོག་ལ་གསེར་སྒུབ་པར་ཕྱིན་པས་དེ་གའི་རྒྱལ་པོས་ཁོས་བཟུང་ན་བཙོན་དུ་བཅུག་ནས་དེར་སྐུ་འདས། 

ཁོང་གི་དབོན་པོ་བྱང་ཆུབ་འོད་ཀྱིས་ཁུ་བོ་བླུ་བྱེད་ལ་གསེར་ལིང་ལུས་ཀྱི་ལྗིད་ཚད་ཙམ་བསྒྲུབས་ཡོད་པ་ཁུ་བོའི་ཞལ་ཆེམས་བཞིན་རྒྱ་བརྩོན་འགྲུས་སེང་གེ་དང་ནག་ཚོ་ལོ་ཙྭ་བ་གཉིས་ལ་གསེར་ཁྱེར་ནས་རྒྱ་གར་ལ་ཇོ་བོ་ཆེན་པོ་གདན་འདྲེན་དུ་བརྫངས། བོད་རབ་བྱུང་དང་པོའི་ཤིང་རྟ་ཕྱི་ལོ་༡༠༤༠ལ་གདན་དྲངས་པ་བཞིན་དཀའ་སྤྱོད་ཀྱི་བོད་དུ་ཕེབས། ཇོ་བོ་རྗེ་བོད་དུ་ཕེབས་སངས་རྒྱས་ཀྱི་བསྟན་པ་དར་སྤེལ་གནང་ཡོད་ལ་ཁྱད་པར་དུ་བྱང་ཆུབ་ལམ་གྱི་སྒྲོན་མེ་ཞེས་བྱ་བའི་གཙོར་བྱས་པའི་གཞུང་ཉི་ཤུ་ལྷག་ཙམ་མཛད་པའི་སྒོ་ནས་བསྟན་པ་ལ་དག་ཐེར་མཛད་པ་སོགས་བསྟན་པ་ལ་མཛད་རྗེས་རླབས་པ་དང་། ཁོང་གི་སློབ་མ་གཙོ་བོར་གྱུར་པ་འབྲོམ་སྟོན་པ་རྒྱལ་བའི་འབྱུང་གནས་སོགས་བསྟན་འཛིན་གྱི་སྐྱེས་ཆེན་དམ་པ་མང་དུ་བྱོན་ཡོད། མདོར་ན་བསྟན་པ་སྔ་དར་ལས་ཕྱི་དར་སྐབས་སུ་དར་རྒྱས་སུ་བྱུང་ཡོད་ཅེས་ཆོས་འབྱུང་ཁག་ལས་གསལ་བ་སོགས་ཡོངས་རྫོགས་བྲིས་སྡོད་ན་ཡིག་ཚོགས་མང་བ་དོགས་ནས་འདི་ཙམ་གྱི་འགྲིག་པ་བྱའོ།།