བཀའ་ཤག་འོག་གི་ལས་ཁུངས།

༡  ཤེས་རིག་ལས་ཁུངས།

དབུས་བོད་མིའི་སྒྲིག་འཛུགས་ཀྱི་བློན་ཆེན་ལས་ཁུངས་བདུན་གྱི་ཡ་གྱལ་ཤེས་རིག་ལས་ཁུངས་ནི། ཕྱི་ལོ་ ༡༩༦༠ ཟླ་ ༡༠ ཚེས་ ༤ ཉིན་བཞུགས་སྒར་དྷ་རམ་ས་ལར་གསར་འཛུགས་བསྐྱངས་ཤིང། ལས་ཁུངས་གསར་འཛུགས་བསྐྱངས་པ་ནས་ལོ་རབས་བདུན་ཅུ་པའི་བར། ལས་ཁུངས་ཀྱི་ལས་འབོར་ལ་གཞིགས་པའི་ལས་བྱེད་མང་པོ་མེད་སྟབས་དྲུང་ཆེའི་ཐད་ཀའི་བཀོད་འདོམས་འོག་ཡོད། ལོ་རབས་བདུན་ཅུ་ནས་བཟུང་བཙན་བྱོལ་ནང་མི་རབས་གཉིས་པ་འཚར་ལོངས་བྱུང་བ་དང༌། སློབ་ཡོན་དང༌། སློབ་འཇུག སློབ་དེབ་སོགས་ཀྱི་ལས་དོན་མང་དག་ཅིག་རིམ་གྱིས་ཐོན་པར་བརྟེན། འཛིན་སྐྱོང་སྡེ་ཚན་དང༌། སློབ་ཡོན་དང་སློབ་འཇུག་སྡེ་ཚན། རྩིས་སྡེ་ཚན། རྩོམ་སྒྲིག་སྡེ་ཚན་བཅས་རྣམས་རིམ་པས་གསར་གཏོད་གནང༌། དེང་སྐབས་ཤེས་རིག་ལས་ཁུངས་སུ་སྡེ་ཚན་བཞི་དང་ཚན་པ་བཅུ་ ཁྱོན་བསྡོམས་གཏན་འཇགས་ལས་བྱེད་ ༥༡ བཅས་ཡོད།

ཤེས་རིག་བཀའ་བློན་བློ་བཟང་སེང་གེ་མཆོག

༢  དཔལ་འབྱོར་ལས་ཁུངས།

༄༅། །ཕྱི་ལོ་ ༡༩༦༠ ལོར་དབུས་བོད་མིའི་སྒྲིག་འཛུགས་བཙན་བྱོལ་དུ་དངོས་སུ་གསར་འཛུགས་གནང་རྒྱུའི་དམིགས་ཡུལ་གཙོ་བོ་རང་འཆས་སུ་མངའ་བས་བོད་ཀྱི་མཐོུང་མ་ཡིན་པའི་རྩ་ཆེའི་ཆོས་དང་རིག་གཞུང་མི་ཉམས་རྒྱུན་འཛིན་གྱིས་བོད་དོན་བདེན་མཐའ་སེལ་ཐབས་དང༌། གཞིས་བྱེས་བོད་མིའི་མངོན་འདོད་བསྒྲུབ་ཕྱིར་བཙན་བྱོལ་སྒྲིག་འཛུགས་ནང་བློན་ཆེན་ལས་ཁུངས་བདུན་ཡོད་ཁོངས་དཔལ་འབྱོར་ལས་ཁུངས་གཅིག་ཡིན། དཔལ་འབྱོར་ལས་ཁུངས་ཀྱི་དམིགས་ཡུལ་གཙོ་བོ་དབུས་བོད་མིའི་སྒྲིག་འཛུགས་ཀྱི་འཕྲལ་ཕུགས་ཕན་བདེའི་སྒྲུབ་པོ་འཕྲིན་ལས་རྒྱས་པའི་མཐུན་རྐྱེན་གཞུང་དངུལ་དཔལ་འབྱོར་འདུ་འགོད་ཐབས་ལེན་ཞུ་རྒྱུ་དང༌། དེ་དག་ཁྲིམས་ལུགས་བཞིན་དབུས་བོད་མིའི་སྒྲིག་འཛུགས་མ་ལག་དང་བཅས་པའི་ལོ་འཁོར་སྔོན་རྩིས་དང་བསྐྱར་བཅོས་སྔོན་རྩིས་འཆར་འབུལ་དཔལ་ལྡན་བཀའ་ཤག་ནས་རྒྱབ་གཉེར་གྱིས་གྲོས་ཚོགས་ནས་བཀའ་འཁྲོལ་ཞུ་རྒྱུས་མཚོན་ལོ་རེའི་བཀའ་འཁྲོལ་ཐོབ་པས་སྔོན་རྩིས་ཁྲིམས་ལུགས་ལྟར་གྱི་གཏོང་ལེན་སྟངས་བཅུན་སླད་ལས་ཁུངས་ཟུར་འཛུགས་གནང་།

ཕྱི་ལོ་ ༢༠༠༡ ལོར་དཔལ་ལྡན་བཀའ་ཤག་ནས་གཞི་རིམ་དཔལ་འབྱོར་སྲིད་བྱུས་གཏན་འབེབས་གནང་སྟེ་གཞུང་གཉེར་ཚོང་འཁོད་རྣམས་རིམ་བཞིན་སྒེར་བདག་ཅན་དུ་བསྒྱུར། དཔལ་འབྱོར་ལས་ཁུངས་ནས་ལོ་བསྟར་སྔོན་རྩིས་དགོས་དངུལ་མི་ཉུང་བ་འབུལ་མུས་ཡིན།

                                                       དཔལ་འབྱོར་བཀའ་བློན་ཚེ་རིང་དོན་འགྲུབ་མཆོག

 

༣  ནང་སྲིད་ལས་ཁུངས།

༄༅།། ཕྱི་ལོ་ ༡༩༥༩ ལོར་བཙན་བྱོལ་དུ་འབྱོར་མ་ཐག་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་ལྟར་བཙན་བྱོལ་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་ཛ་དྲག་ཐོག་རང་རིགས་རྣམས་གཞིས་འཁོད་ཐུབ་ཐབས་ཀྱི་ལས་དོན་ཞུ་སྒོ་འགོ་འཛུགས་ཞུས་ཤིང་། ནང་སྲིད་ལས་ཁུངས་ཀྱི་དམིགས་ཡུལ་དང་ལས་འགན་གཙོ་བོ་བོད་མིའི་རང་དབང་སླར་གསོའི་བདེན་པའི་འཐབ་རྩོད་ཐོག་རང་རེའི་མཐུན་མོང་མ་ཡིན་པའི་ཆོས་དང་རིགས་གཞུང་གོམས་གཤིས་བཟང་པོ་རྣམས་མི་ཉམས་རྒྱུན་འཛིན་དང་ཉམས་པ་སླར་གསོའི་འཛིན་སྐྱོང་སྤེལ་གསུམ་གྱི་རྨང་གཞི་གཙོ་བོ་རྒྱ་བལ་འབྲུག་གསུམ་གྱི་ནང་བོད་མི་རྣམས་བཙན་བྱོལ་དུ་གནས་སྡོད་རིང་གཞིས་འཁོད་ཐུབ་ཐབས་དང་། གཞིས་ཆགས་ཟིན་པ་རྣམས་ཀྱི་འཚོ་རྟེན་ཕུགས་འཕེར་བསྲ་བརྟན་ཡོང་སླད་སོ་ནམ་ལས་གཞི་གཙོ་གྱུར་ཐོག་ལག་ཤེས་དང་། འཕྲུལ་རིགས། ཚོང་ལས་སོགས་ལས་རིགས་འདྲ་མིན་གྱི་གོ་སྐབས་འཛུགས་བསྐྲུན་གསར་རྩོམ་ཞུ་རྒྱུ། དེ་བཞིན་མང་ཚོགས་ཁྲོད་ཉམ་ཐག་དང་རྒས་གཅོང་མགོན་མེད་ངལ་ཅན་རིགས་ལ་བལྟ་སྐྱོང་ཞུ་རྒྱུ་བཅས་ཡིན་པ་དང་། ཉེ་བའི་ལོ་ཤས་ནང་གི་གནས་སྟངས་ཆ་ནས་ལས་ཁུངས་ཀྱི་ལས་དོན་གཙོ་གལ་ཆེ་བ་ཞིག་ད་ཡོད་གཞིས་ཆགས་རྣམས་བརྟན་གནས་ཡོང་ཐབས་དང་། དེའི་ཆེད་གཞིས་ཆགས་སོ་སོའི་ནང་སོ་ནམ་གྱིས་གཙོས་འཚོ་རྟེན་ཡར་རྒྱས་གཏོང་ཐབས་བྱ་རྒྱུ་དེ་ཆགས་ཡོད།

ནང་སྲིད་བཀའ་བློན་རྒྱ་རི་སྒྲོལ་མ་མཆོག

༤  བདེ་སྲུང་ལས་ཁུངས།

༄༅།། དབུས་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་འདི་བཞིན་བཀའ་བློན་ལས་ཁུངས་བདུན་གྱི་གྲས་ནས་གཅིག་ཡིན་པ་དང་། ལས་ཁུངས་འདི་ཐོག་མར་ ༡༩༥༩ ལོར་གསར་འཛུགས་བསྐྱངས་ཤིང་། ལས་ཁུངས་འདིའི་ལས་འགན་གཙོ་བོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱའི་ཉེན་སྲུང་ཞུ་རྒྱུ་དེ་ཡིན་ཅིང་། ཕྱོགས་མཚུངས་བཙན་བྱོལ་སྤྱི་ཚོགས་ནང་འགྱུར་འགྲོས་ཀྱི་གནས་ཚུལ་ལ་བརྟག་ཞིབ་དང་། ལྷག་པར་དུ་བོད་ནང་གི་འགྱུར་འགྲོས་གནས་སྟངས་ཐད་རྟོག་ཞིབ་ཞུ་རྒྱུ་སོགས་དམིགས་བསལ་ལས་འགན་ཡོད།་ད་ལྟའི་ཆར་བཀའ་བློན་དང་དྲུང་ཆེ་རྣམ་གཉིས་ཀྱི་སྟངས་འཛིན་འོག་རྒྱུན་གཏན་གྱི་ཞུ་སྒོ་ཁག་གྲུབ་བཞིན་ཡོད།

བདེ་སྲུང་བཀའ་བློན་འབྲོག་ཆུང་དངོས་གྲུབ་མཆོག

༥  ཕྱི་དྲིལ་ལས་ཁུངས།

༄༅། །བཙན་བྱོལ་བོད་མིའི་བཅའ་ཁྲིམས་དང་འཛིན་སྐྱོང་བཀོད་ཁྱབ་འོག་ཕྱི་དྲིལ་ལས་ཁུངས་ནས་བཙན་བྱོལ་བོད་མིའི་སྒྲིག་འཛུགས་ཀྱི་རྒྱལ་སྤྱིའི་ཕྱི་འབྲེལ་དང་དྲིལ་བསྒྲགས་ལས་དོན་གྱི་འགན་ཁུར་རྐང་ལེན་ཞུ་གི་ཡོད། དེ་ཡང་ཕྱི་དྲིལ་ལས་ཁུངས་ཀྱི་ཐོག་མའི་ལས་དོན་ཕྱག་ལེན་དབུ་འཛུགས་གནང་ཚུལ་ནི། རྒྱ་ནག་གཞུང་གིས་བོད་ས་ཡོངས་རྫོགས་བཙན་བཟུང་བྱས་རྗེས་༸གོང་ས་༸སྐྱབས་མགོན་ཆེན་པོ་མཆོག་དང་བོད་གཞུང་བཀའ་ཤག་སྐུ་འཁོར་ཧྲག་བསྡུས་བཅས་རྒྱ་གར་དུ་བཙན་བྱོལ་དུ་ཕེབས་ཏེ་ཕྱི་ལོ་ ༡༩༥༩ ཟླ་ ༤ ནང་གནས་སྐབས་བཞུགས་སྒར་མ་སུ་རིར་བོད་གཞུང་བཀའ་ཤག་གིས་དབུས་ལས་ཁུངས་ཆེ་ཁག་ལྔ་བསྐྱར་སྒྲིག་བསྐྱངས་པའི་ཁོངས་སུ་དེ་སྔ་བོད་རང་བཙན་སྐབས་ཀྱི་ཕྱི་སྲིད་ཁང་ཡང་བཀོད་སྒྲིག་གནང་ཡོད། ཕྱི་ལོ་ ༡༩༦༠ ལོར་༸གོང་ས་༸སྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་རྡ་རམ་ས་ལར་སྤོས་གནང་། ཕྱི་སྲིད་དང་དྲིལ་བསྒྲགས་ལས་ཁུངས་ཟླ་སྒྲིལ་གནང་ཡང་ཕྱི་ལོ་ ༡༩༦༩ ཟླ་ ༣ པའི་ནང་ཕྱི་འབྲེལ་གྱི་ལས་དོན་ཞུ་སྒོའི་རིགས་ལྡི་ལི་བོད་གཞུང་སྐུ་ཚབ་དོན་གཅོད་ཁང་ནས་གནང་རྒྱུ་གཏན་འབེབས་གནང་ཡོད། རྒྱལ་སྤྱིའི་ནང་བོད་དོན་ཐོག་དོ་སྣང་བྱེད་ཤུགས་ཆེ་རུ་སོང་བ་དང་ཆབས་ཅིག་རང་རེའི་བོད་མིའི་སྤྱི་ཚོགས་ཁྲོད་དུ་ཆབ་སྲིད་དང་། འགྲོ་བ་མིའི་ཐོབ་ཐང་། ཁོར་ཡུག་སྲུང་སྐྱོབ་བཅས་ཀྱི་གནས་ཚུལ་དང་། ་བོད་གཞུང་ཕྱི་འབྲེལ་དང་དྲིལ་བསྒྲགས་ལས་ཁུངས་ཞེས་རྩ་བའི་ལས་ཁུངས་གཅིག་ལ་ལས་འགན་གཉིས་སུ་འགན་ཁུར་བཞེས་ཡོད།

ཕྱི་དྲིལ་བཀའ་བློན་བདེ་སྐྱིད་ཆོས་དབྱིངས་མཆོག

༦ འཕྲོད་བསྟེན་ལས་ཁུངས།

༄༅། །བོད་གཞུང་འཕྲོད་བསྟེན་ལས་ཁུངས་འདི་ཡང་ཕྱི་ལོ་ ༡༩༨༡ ལོར་བཀའ་བློན་ལྷན་ཁང་གཅིག་གི་ངོ་བོར་ལོགས་སུ་རྒྱ་བསྐྱེད་མཛད་ཅིང་། འཕྲོད་བསྟེན་ལས་ཁུངས་ཀྱི་བྱེད་སྒོ་ནི་བཙན་བྱོལ་བོད་མིའི་བཅའ་ཁྲིམས་དགོངས་དོན་ལྟར་མང་ཚོགས་ཀྱི་འཕྲོད་བསྟེན་དང་། གཙང་སྦྲ། སྨན་བཅོས་བཅས་ཀྱི་མཐུན་རྐྱེན་འདང་ངེས་ཡར་རྒྱས་གཏོང་རྒྱུ་དང་། འཁོས་དམན་རྣམས་ལ་རིན་མེད་སྨན་སྦྱིན་སྤྲོད་ཐབས་བྱ་རྒྱུ་དང་། གཅོང་ནད་དང་འགོས་ནད་རིགས་སྔོན་འགོག་དང།དམིགས་བསལ་སྨན་བཅོས་བྱ་རྒྱུ། ཁོར་ཡུག་སྲུང་སྐྱོབ་ཀྱི་སློབ་གསོ་སྤེལ་རྒྱུ། ཁྱད་པར་དུ་བོད་ཀྱི་གནའ་སྲོལ་སྨན་གྱི་ལག་ལེན་དང།སྨན་སྦྱོར། བོད་ཀྱི་གསོ་རིག་དང་དེང་རབས་ཀྱི་གསོ་རིག་ཕན་ཚུན་གོ་བསྡུར་ཉམས་ཞིབ་ཡར་རྒྱས་གཏོང་ཐབས། དེ་བཞིན་བོད་སྨན་གྱི་སྨན་སྦྱོར་ལག་ལེན་བསྟར་ཕྱོགས་ཚད་ལྡན་ཡོང་ཐབས་སུ་ཁྲིམས་ལུགས་ལྟར་ལྟ་རྟོག་སྟངས་འཛིན་བྱ་རྒྱུ་བཅས་ཡིན་པ་ལྟར། བཙན་བྱོལ་དུ་ཐུན་མོང་མ་ཡིན་པའི་བོད་ཀྱི་གསོ་རིག་སྨན་གཞུང་དང་སྐར་རྩིས་གཞུང་གཉིས་ཀྱི་ཉམས་ལེན་མི་ཉམས་རྒྱུན་འཛིན་ཐུབ་ཐབས་སུ་བོད་གཞུང་སྨན་རྩིས་ཁང་ནས་འཛིན་སྐྱོང་སྤེལ་གསུམ་གནང་བཞིན་པ་ཡིན།

འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག

༧  ཆོས་རིག་ལས་ཁུངས།

༄༅། དབུས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནི་བཙན་བྱོལ་སྒྲིག་འཛུགས་ཀྱི་བློན་ཆེན་ལས་ཁུངས་ཤིག་ཡིན། འདིའི་ལས་འགན་གཙོ་བོ་ནི་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་མི་ཉམས་རྒྱུན་འཛིན་ཉམས་པ་གསོ་གཅོས་ཆོས་རིག་དང་འབྲེལ་བའི་གཏན་འབེབས་སྲིད་བྱུས་ལག་བསྟར་དང་། ཁྱབ་ཁོངས་དགོན་སྡེའི་སྒྲིག་འཛུགས་ཁག་ལ་ལམ་སྟོན་དང་མཐུན་འགྱུར་ཞུ་རྒྱུ་སོགས་ཡིན།

ཕྱི་ལོ་ ༡༩༥༩ ཟླ་ ༤ ཚེས་ ༢༧ ཉིན་བོད་མིའི་ཆོས་སྲིད་གཉིས་ཀྱི་བླ་ན་མ་འཆི་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ ཆེན་པོ་མཆོག་གིས་མ་སུ་རིར་ཆོས་དོན་ལྷན་ཚོགས་ཀྱི་མཚན་ཐོག་དབུ་འཛུགས་གནང་བ་ནས་བཟུང་ལས་འགོ་བརྩམས། དེ་ནས་ཕྱི་ལོ་ ༡༩༦༠ ཟླ་ ༥ ཚེས་ ༣༠ ཉིན་༸གོང་ས་༸སྐྱབས་མགོན་ཆེན་པོའི་བཞུགས་སྒར་དང་བོད་གཞུང་གི་རྟེན་གཞི་ཌྷརྨཤལར་གནས་སྤོས་གནང་ཞིང་། བཙན་བྱོལ་བོད་གཞུང་འདི་ཉིད་མང་གཙོའི་སྒྲིག་འཛུགས་སུ་བསྒྱུར་སྐབས། ཕྱི་ལོ་ ༡༩༥༩ ཟླ་ ༩ ཚེས་ ༡༢ ཉིན་ཆོས་དོན་ལྷན་ཚོགས་དེ་ཉིད་འཛིན་སྐྱོང་སྡེ་ཚན་གྱི་ལྷན་ཁང་གཙོ་ཆེ་ལྔ་ཡི་ནང་ནས་གཅིག་ཡིན།

ཆོས་རིག་བཀའ་བློན་པདྨ་ཆོས་འབྱོར་མཆོག