ཆོས་རྒྱལ་ཁྲི་སྲོང་ལྡེའུ་བཙན།
རྒྱལ་བོ་ཁྲི་སྲོང་ལྡེ་བཙན་ནི་བོད་དུ་ཆོས་སྲིད་གཉིས་ཀར་མཛད་རྗེས་ཆེ་བའི་བཙན་པོ་མེས་དབོན་རྣམ་གསུམ་ཞེས་གྲགས་པའི་ནང་ཚན་ཡིན།
ཁོང་ནི་༧༤ལོར་འཁྲུངས།
དགུང་ལོ་བཅོ་ལྔ་བ་མེ་སྤྲེལ（༧༥༩）ལོར་སྲིད་དབང་ཕྱག་ཏུ་བཞེས་ཏེ།མཐའ་བཞིའི་མངའ་འབངས་ཡོངས་ལ་བཀའ་ཤོག་ཆེན་པོ་བསྩལ་ཅིང་།མངའ་ཐང་དར་རྒྱས་ཆེ་བའི་རྩེ་མོར་སོན་ཏེ།ཆོས་སྲིད་གཉིས་ཀར་མཛད་རྗེས་རླབས་ཆེན་ཆེ་བ་བྱུང་བ་གཤམ་གསལ་ལྟར།
༡.སྲིད་དབང་བཟུང་ནས་ལོ་བདུན་པ་ཆུ་སྟག（༩༦༢）ལོར་དམག་དཔོན་ཞང་རྒྱལ་གཟིགས་སོགས་ཀྱིས་ཐང་གི་མངའ་ཁོངས་ས་ཆ་ལོ་བཅོ་ལྔ་ཙམ་བདག་བཟུང་བྱས།
༢.སྲིད་དོན་བྱས་རྗེས་ཅན་ལ་བཟང་བསྟོད་དང་།སྲིད་དོན་བྱ་བ་གལ་ཆེའི་རིགས་བློན་རྣམས་དང་གྲོས་བསྡུར་གྱིས་རྒྱལ་བློན་གང་འོག་མཐུན་སྒྲིལ་ཆེ་བས་བཙན་པོའི་སྲིད་ཤུགས་ཇེ་ཆེར་སོང་བ།
༣.མཁན་ཆེན་ཞི་བ་འཚོ་དང་སློབ་དཔོན་པདྨ་འབྱུང་གནས་སྤྱན་དྲངས་ཏེ་གཞི་རྒྱ་ཆེ་ཞིང་བཀོད་པ་ལེགས་པའི་བསམ་ཡས་གཙུག་ལག་ཁང་བཞེངས་པ།
༤.བསམ་ཡས་སུ་རང་བྱུང་གི་སྡེ་ཐོག་མར་བཙུགས་ནས་ནང་བའི་བསྟན་པ་དར་རྒྱས་ཀྱི་རྨང་གཞི་ཐོག་མར་འདིང་བར་མཛད་པ།
༥.བཙན་པོ་རང་ཉིད་ས་གནས་སོ་སོར་དངོས་སུ་ཕེབས་ཏེ།ལོ་ཙཱ་བ་གསོ་སྐྱོང་དང་།
མདོ་སྔགས་རིག་གནས་དང་བཅས་བ་བོད་ཡིག་ཏུ་བསྒྱུར་ཏེ།བོད་སྐད་ཡིག་སྒྱུར་གྱི་བྱ་གཞག་འཕེལ་རྒྱས་ཆེན་པོ་བྱུང་བ།
༦.བོད་ཀྱི་སྨན་པ་མཁས་པ་ཕྱི་རྒྱལ་དུ་མངགས་པ་དང་།ཕྱི་རྒྱལ་དང་ནང་སའི་སྨན་པ་མཁས་པ་བོད་དུ་གདན་དྲངས་ཏེ་གུས་བཀུར་སྣེ་ལེན་ཕུན་སུམ་ཚོགས་པ་གནང་ནས་སྨན་གཞུང་གསར་རྩོམ་དང་ཡིག་བསྒྱུར་ཟུང་འབྲེལ་ཐོག་ནས་བོད་ཀྱི་སྨན་བཅོས་འཕྲོད་བསྟེན་བྱ་གཞག་དར་རྒྱས་གཏོང་གནང་མཛད་པ།
མཐའ་མེ་གླང（༧༩༦）ལོར་སྐུ་གཤེགས།
མཁན་ཆེན་བོ་དྷི་སྭ་ཏྭ་ཏམ་མཁན་ཆེན་ཞི་བ་འཚོ།
མཁན་ཆེན་བོ་དྷི་སྭ་ཏྭ་ཏམ་མཁན་ཆེན་ཞི་བ་འཚོ་ནི་བོད་དུ་སངས་རྒྱས་ཆོས་ལུགས་ཀྱི་རབ་བྱུང་ཐོག་མར་འཛུགས་སྐབས་སྡོམ་པ་གནང་མཁན་ཡིན་པས་མཁན་པོ་དང་།བྱང་ཆུབ་ཀྱི་སེམས་ཐུགས་བརྒྱུད་ལ་མངའ་བས་བོ་དྷི་སྭ་ཏྭ་སྟེ་བྱང་ཆུབ་སེམས་དཔའ་ཞེས་ཞུ་སྲོལ་ཡོད་ཅིང་མཚན་དངོས་ནི་རྒྱ་གར་སྐད་དུ་ཤནྟ་རཀྵིཏ་སྟེ་བོད་སྐད་ལ་བསྒྱུར་ན་ཞི་བ་འཚོ་ཟེར།
དམ་པ་འདི་ནི་རྒྱ་གར་ཕྱོགས་ཀྱི་ཡུལ་བམ་གྷ་ལའམ་ཟ་ཧོར་གྱི་གྲོང་ཁྱེར་དུ་ཡབ་རྒྱལ་བོ་གཙུག་ལག་འཛིན་ལ་སྲས་ལྕམ་སྲིང་གསུམ་ཡོད་པའི་འབྲིང་བོ་ཡིན།
བོད་ཀྱི་ལོ་རྒྱུས་ཡིག་ཆ་མང་བོར་དམ་པ་འདི་དགུང་ལོ་དགུ་བརྒྱ་ལྷག་ཙམ་བཞུགས་ཟེར་སྲོལ་འདུག
མཁན་པོ་འདི་རྒྱལ་པོ་ཁྲི་སྲོང་ལྡེ་བཙན་གྱིས་བོད་དུ་ཐེངས་གཉིས་གདན་དྲངས་པའི་ཐེངས་དང་པོ་འདིར་ཟླ་བ་ཁ་ཤས་ལས་མ་བཞུགས་ཤིང་།
བསམ་ཡས་གཙུག་ལག་ཁང་གི་ས་འདུལ་དང་རྨང་བཏིང་བ་ཙམ་ལས་མཛད་ལོང་མ་བྱུང་བར་བོད་ནས་བལ་ཡུལ་དུ་ཕྱིར་ཕེབས་གནང་དགོས་བྱུང་།
དེ་རྗེས་སླར་ཡང་སློབ་དཔོན་ཆེན་པོ་པདྨ་འབྱུང་གནས་དང་མཉམ་དུ་གདན་དྲངས་ཏེ་བསམ་ཡས་གཙུག་ལག་ཁང་གི་ས་འདུལ་དང་།
རྩིག་རྨང་འདིང་བ། གཙུག་ལག་ཁང་དངོས་སུ་བཞེངས་ནས་རབ་གནས་མཛད་པ། དེ་རྗེས་སད་མི་དྲུག་གམ་བདུན་རབ་ཏུ་བྱུང་ནས་དགེ་འདུན་གྱི་སྡེ་བཙུགས་པ་བཅས་མཛད།
དམ་པ་ཁོང་ནི་བོད་ཀྱི་ལོ་རྒྱུས་ནང་འགག་འགོངས་ཆེན་ཤོས་གཅིག་ཡིན་ནོ།
སློབ་དཔོན་པདྨ་འབྱུང་གནས།
སློབ་དཔོན་འདི་ལ་སློབ་དཔོན་རིན་པོ་ཆེ།
ཨོ་རྒྱན་རིན་པོ་ཆེ། གུ་རུ་རིན་པོ་ཆེ་སོགས་འབོད་སྲོལ་མང་མོད།
རྒྱུན་དུ་སློབ་དཔོན་པདྨ་འབྱུང་གནས་ཞེས་སུ་འབོད།
ཁོང་དུས་རབས་བརྒྱད་པའི་དུས་མཇུག་ཙམ་ལ་རྒྱ་གར་ནུབ་ཕྱོགས་ཨོ་ཌི་ཡཱ་ན་སྟེ།
བོད་སྐད་དུ་ཨོ་རྒྱན་མཁའ་འགྲོའི་གླིང﹙དེང་སྐབས་ཕ་ཁི་སི་ཐན་གྱི་ཁོངས་སུ་ཡོད﹚གི་དྷ་ན་ཀོ་ཤ་ཟེར་བའི་མཚོ་ཡི་ནང་དུ་མེ་ཏོག་པདྨའི་ནང་བརྫུས་ཏེ་འཁྲུངས་པར་བཤད།
ཁོང་གིས་ཆུང་དུས་ནས་རིག་པའི་གནས་ཆེ་ཆུང་དང་བརྟག་པ་བརྒྱད་སོགས་ཚེགས་མེད་དུ་མཁྱེན།
གསང་སྔགས་ཀྱི་སློབ་དཔོན་ཤནྟི་རུ་པ་དང་། གྲུབ་ཆེན་སུ་ཁ་དེ་བ།
མཁའ་འགྲོ་མ་སུ་ཁ་དྷ་རི་བཅས་ཀྱི་མདུན་ནས་གསང་སྔགས་ཀྱི་ཆོས་མང་དུ་བསླབས།
དེ་ནས་བཟུང་ཁོང་རི་བྲག་དང་དུར་ཁྲོད་སོགས་སུ་ཡོ་ག་སྒོམ་ཞིང་།
དྷ་བུ་ཀྲི་ཏ་སོགས་གྲུབ་པ་ཐོབ་པའི་སློབ་དཔོན་བརྒྱད་ལས། རལ་གྲི་དང་། རིལ་བུ།
མིག་སྨན། རྐང་མགྱོགས། སྨན། བཅུད་ལེན། གཏེར་གྱི་བུམ་པ། གསེར་འགྱུར་གྱི་རྩི་སོགས་ཀྱི་ཐུན་མོང་གི་དངོས་གྲུབ་བརྒྱད་ཐོབ།
དེ་ནས་རྒྱལ་བོ་དྷརྨཔཱ་ལ་ཡིས་སྲིད།
སློབ་དཔོན་གྱི་བཀའ་ལྟར་རྒྱ་གར་བྷང་གྷ་ལའི་ཡུལ་གྱི་གྲོང་ཁྱེར་པ་ཎ་ཌ་པའི་བྱང་ཕྱོགས་ཀྱི་ནགས་ཚལ་པར་ཤི་ཞེས་བྱ་བར་བཞུགས་ནས་གསང་སྔགས་ཀྱི་སྤྱོད་པ་མཛད་དེ་མཆོག་གི་དངོས་གྲུབ་བརྙེས།
དེ་ནས་རྒྱ་གར་བྱང་ཕྱོགས་ཀྱི་ཡུལ་ཏི་ར་ཧུ་ཏི་དང་བལ་ཡུལ། ཤར་ཕྱོག་ཀཱ་མརུ།
ལྷོ་ཕྱོགས་ཏྲི་མ་ལ་སོགས་སུ་ཕྱིན་ནས་མུ་སྟེགས་པ་མང་པོ་བཏུལ་ཞིང་ལྷ་འདྲེ་མང་པོ་དམ་ལ་བཏགས་ཏེ་བོད་དུ་བྱོན།
བོད་ཀྱི་ལོ་རྒྱུས་ནང་གལ་གནད་ཆེ་ཤོས་གཅིག་ངོས་འཛིན་བྱས་སོ།
No comments:
Post a Comment