འཕགས་པ་ཐོགས་མེད།
 |
| འཕགས་པ་ཐོགས་མེད་ལ་ན་མོ། |
སྡེ་སྣོད་གསུམ་ལ་སྦྱངས་པས་ལོ་ལྔའི་རིང་ལོ་རེར་ཚིགས་བཅད་འབུམ་ཕྲག་རེའི་ཚིག་དོན་མཐའ་དག་བྱང་ཆུབ་པར་མཛད།
འོན་ཀྱང་ཤེར་ཕྱིན་གྱི་སྦས་དོན་མངོན་རྟོགས་ཀྱི་རིམ་པ་ཤིན་ཏུ་རྟོགས་དཀའ་བར་བརྟེན། རི་བོ་བྱ་རྐང་
༼ ཀུཀ་ཀུཊ་པཱདཔརྦཏ ༽ཅན་གྱི་བྲག་ཕུག་ཏུ་ལྷག་པའི་ལྷ་རྗེ་བཙུན་བྱམས་པ་མགོན་པོ་ལོ་གསུམ་གྱི་རིང་བསྒྲུབས་ཀྱང་འགྲུབ་པའི་རྟགས་མཚན་ཅི་ཡང་མ་བྱུང་སྟབས་ཕྱིར་ཐོན་པས།
བྲག་ངོས་སུ་བྱ་སྒྲོས་བྲག་ཟད་པར་གཟིགས་ཏེ་བརྩོན་འགྲུས་དགོས་པར་དགོངས་ནས་སླར་ཡང་བྲག་ཕུག་ཏུ་ལོ་གསུམ་བསྒྲུབས།
དེས་ཀྱང་ལྟས་བཟང་བ་ཙམ་ཡང་མ་བྱུང་སྟབས་ཕྱིར་ཐོན་པ་ན། ཕུག་པའི་སྒོར་ཆུ་ཐིགས་ཀྱིས་བྲག་ཀོང་ཀོང་བཟོས་པར་གཟིགས་ནས་ད་དུང་བརྩོན་འགྲུས་དགོས་པར་དགོངས་ཏེ་སླར་ཡང་ཕུག་པར་ལོ་གསུམ་བསྒྲུབས།
ད་དུང་ལྟས་གང་ཡང་མ་བྱུང་སྟབས་བྲག་ཕུག་ནས་ཕྱོར་ཐོན་པས།
མི་རྒན་ཞིག་གིས་རས་བལ་འཇམ་པོས་ལྕགས་གདུང་བརྡར་བཞིན་སྔར་ཡང་ཁབ་འདི་ཙམ་བཟོས་ཟིན། ད་དུང་འདིས་ཁབ་བཟོ་བ་ཡིན་བྱས་པས།
བྱ་པ་ཕལ་པར་བརྩོན་འགྲུས་འདི་ཙམ་དགོས་ན། དོན་ཆེན་པོ་ལ་བརྩོན་འགྲུས་ཅི་མི་བྱེད་དགོངས་ཏེ།
སླར་བྲག་ཕུག་ཏུ་བཞུགས་ནས་ལོ་གསུམ་བཅས་ཁྱོན་མི་ལོ་བཅུ་གཉིས་བར་བསྒྲུབས་ཀྱང་རྟགས་མཚན་བཟང་བ་ཙམ་ཡང་མ་བྱུང་སྟབས།
ཐུགས་ཤིན་ཏུ་སྐྱོ་ཞིང་སྒྲུབ་ཕུག་གི་ཕྱིར་ཐོན་པའི་ལམ་དུ་ཁྱི་མོ་ལུས་སྨད་འབུས་འཇོམས་པ་ཞིག་གཟིགས་པར་སྙིང་རྗེ་ལྷག་པར་སྐྱེས་ནས་རང་གི་ལུས་ཀྱི་ཤ་བཀོག་སྟེ་དེའི་སྟེང་ལྗགས་ཀྱིས་འབུ་རྣམས་བླངས་པར་བརྩམས་པས་ལས་སྒྲིབ་དག་ནས་རྗེ་བཙུན་བྱམས་པ་མགོན་པོ་དངོས་སུ་ཞལ་གཟིགས།
དེ་ནས་རྗེ་བཙུན་གྱིས་རྗེས་བཟུང་སྟེ་དགའ་ལྡན་ཡིད་དགའ་ཆོས་འཛིན་དུ་ཁྲིད་ནས་ལོ་ཉེར་ལྔའི་རིང་ཐེག་པ་ཆེན་པོའི་ཆོས་གསུངས་པས།
ཤེར་ཕྱིན་གྱི་དངོས་བསྟན་དང་། སྦས་དོན། ལམ་གྱི་རིམ་པ་ཆ་ཚང་རྟོགས་ནས་འཕགས་པའི་ས་ཐོབ།
རྗེ་བཙུན་ལས་མངོན་རྟོགས་རྒྱན། མདོ་སྡེ་རྒྱན། དབུས་མཐའ་རྣམ་འབྱེད། ཆོས་ཉིད་རྣམ་འབྱེད།
རྒྱུད་བླ་མ་སྟེ་བྱམས་ཆོས་སྡེ་ལྔ་གསན་ནས་མི་ཡུལ་དུ་ཕེབས། མ་ག་དྷའི་ཡུལ་པོ་ལུ་བ་ནར་ཆོས་ཀྱི་མྱུ་གུ་དགོན་ཞེས་པའི་གཙུག་ལག་ཁང་བཞེངས།
གནས་དེར་མངོན་ཤེས་དང་རྫུ་འཕྲུལ་ལ་མངའ་བརྙེས་ཤིང་། མདོ་སྡེའི་དོན་ལ་མཁས་པའི་སློབ་མ་མང་པོ་བྱུང་།
སློབ་དཔོན་འདིས་མངོན་པ་ཀུན་བཏུས་དང་། ཐེག་བསྡུས་ཏེ་སྡོམ་རྣམ་གཉིས་དང་། ས་སྡེ་ལྔ་སོགས་མཛད་དེ་སེམས་ཙམ་པའི་ལྟ་བའི་སྲོལ་ཕྱེས་པས་ཤིང་རྟའི་སྲོལ་འབྱེད་ཅེས་ཞུ་བ་ཡིན།
དེ་ནས་ནུབ་ཕྱོགས་དང་ཉེ་བའི་གྲོང་ཁྱེར་ས་ག་རིར་ཕེབས།
དེར་ཕྱོགས་བཞི་ནས་དགེ་སློང་ཐམས་ཅད་སློབ་མར་འདུས་པར་ཆོས་མང་དུ་བསྟན་པས་དེ་དག་ཐེག་པ་ཆེན་པོའི་རིགས་སད་ཅིང་།
ཤེར་ཕྱིན་གྱི་དོན་ལ་མཁས་པ་སྟོང་ཕྲག་བརྒལ་བ་བྱུང་། རྒྱལ་པོ་ཟབ་མོའི་ཕྱོགས་ཀྱིས་སློབ་དཔོན་ལ་མངོན་ཤེས་ཡོད་མེད་བརྟག་ཕྱིར།
མ་ཧེ་ནག་པོ་ས་དཀར་བྱུག་པ་ཞིག་ཁྱིམ་དུ་སྦས། གསེར་བུམ་དུ་མི་གཙང་བ་བླུགས་ནས་ཁ་སྦྲང་རྩིས་བཀང་སྟེ་རས་ཀྱིས་བཏུམས་པ་ཞིག་ལག་ཏུ་བཟུང་སྟེ།
ཁྱིམ་འདི་ན་ཅི་ཡོད། ལག་ཏུ་བཟུང་བ་འདི་གང་ཡིན་ཞུས་པར་ལན་མ་ནོར་བར་གསུངས། ད་དུང་ཤེར་ཕྱིན་གྱི་ཚིག་གི་དྲི་བ་གསུམ་དང་།
དོན་གྱི་དྲི་བ་གསུམ་ཡིད་ཀྱིས་དྲིས་པར་ལན་མ་ནོར་བར་གསུངས། རྒྱལ་པོ་དང་སྐྱེ་བོའི་ཚོགས་ཐམས་ཅད་ཧ་ལས་ཤིང་དད་གུས་ལྷག་པར་འཕེལ་ཏེ།
ཐེག་པ་ཆེན་པོའི་ཆོས་གཞི་ཉེར་ལྔ་བསྐྲུན་པར་མཛད།
གནས་དེར་རང་གི་གཅུང་དབྱིག་གཉེན་ཐེག་པ་ཆེན་པོའི་བསྟན་པའི་སྒོར་བཅུག
ལྷོ་ཕྱོགས་ཀྲིཥྞ་ར་ཛར་ཟླ་བ་གསུམ་གྱི་ལམ་དུ་རྫུ་འཕྲུལ་གྱིས་དྲོ་ཡུན་གཅིག་ལ་སླེབས་པར་མཛད།
གནས་དེར་བྲམ་ཟེ་བུ་སུ་ནཱ་འཁོར་ལྔ་བརྒྱས་མཆོད། གནས་དེ་དང་ནུབ་ཕྱོགས་ཨོ་རྒྱན་གྱི་ཡུལ་གཉིས་སུ་མཆོད་རྟེན་བརྒྱ་ཕྲག་རེ་དང་།
ལྷ་ཁང་ཉི་ཤུ་རྩ་ལྔ་རེ་བཞེངས། མ་ག་དྷར་མཆོད་རྟེན་བརྒྱད་དང་། ཆོས་གཞི་ཉེར་ལྔ་བཙུགས། གར་ལོག་པའི་༼ ཁ་ཆེ ༽་དམག་བྱུང་བར། སློབ་དཔོན་དང་སློབ་མའི་ཚོགས་ཀྱིས་བྱམས་པའི་ཏིང་ངེ་འཛིན་བསྒོམས་པས་མདའ་དང་།
རལ་གྲི་སོགས་མཚོན་ཆ་ཇི་ཙམ་འཕངས་ཀྱང་གནོད་མ་ཐུབ། སྐུ་ཚེའི་མཇུག་ཏུ་ནཱ་ལེནྡྲའི་མཁན་པོ་ལོ་བཅུ་གཉིས་མཛད་དེ་བསྟན་པའི་བདག་པོར་གྱུར།
མཐར་རྒྱལ་པོའི་ཁབ་ཏུ་སྐུ་ཡི་བཀོད་པ་བསྡུས་ནས་དགའ་ལྡན་དུ་གཤེགས་སོ།
No comments:
Post a Comment