འཛིན་རིམ་བཅུ་གཅིག་གི་བོད་ཡིག་སློབ་ཚན་གྱི་དྲི་བ་དང་ལན།

སློབ་ཚན་དྲུག་པ། ༼བོད་ཀྱི་རིག་གནས་དར་ཚུལ་གཉིས་པ།༽

༡༽ བསམ་ཡས་གཙུག་ལག་ཁང་གི་གླིང་མི་འདྲ་བ་རྣམས་གང་ཡིན་ནམ། 

ལན།བསམ་ཡས་གཙུག་ལག་ཁང་གི་གླིང་མི་འདྲ་བ་བརྒྱད་ཡོད་པ་དེ་དག་ནི་༡)སྒྲ་བསྒྱུར་ལོ་ཙཱ་གླིང་། ༢)བདུད་འདུལ་སྔགས་པ་གླིང་། ༣)རྣམ་དག་ཁྲིམས་ཁང་གླིང་། ༤)དགའ་ལྡན་སེམས་བསྐྱེད་གླིང་། ༥)མི་གཡོ་བསམ་གཏན་གླིང་། ༦)བརྡ་སྤྲོད་ཚང་བའི་གླིང་། ༧)བཻ་རོ་ཙ་ནའི་གླིང་བཅས་སོ།

༢༽ བོད་དུ་འབངས་གྱེན་ལོག་ཐོག་མ་ཇི་ལྟར་བྱུང་ངམ། དེ་དག་གི་འགོ་འཁྲིད་མཁན་སུ་དང་སུ་ཡིན་ནམ། ལན།གླང་དར་མས་ནང་ཆོས་བསྣུབས་པར་བརྟེན་འབངས་རྣམས་སྙིང་ནད་མ་ཞི་བར་ས་གླང་ནས་བཟུང་གྱེན་ལོག་བྱུང་། ཁག་སོ་སོར་གྱེས། འགོ་འཁྲིད་ནི་དབས་ཁོ་བཞེར་ལེགས་དང་། དབས་ལོ་ཕོ་ལོ་ཆུང་དང་། མཆིམས་ཀོང་མི་དྲུག་རྣམས་ཡིན་ནོ།

༣༽ བོད་ཀྱི་མཁས་པ་མི་གསུམ་ཞེས་པ་སུ་དང་སུ་ཡིན་ནམ། 

ལན།༡ ༽གཙང་རབ་གསལ། ༢ ༽གཡོ་དགེ་འབྱུང་། ༣ ༽དམར་ཤཱཀྱ་མུ་ནེ་གསུམ་རེད།

༤༽ བསྟན་པའི་མེ་རོ་གསོ་མཁན་གྱི་མཚན་ལ་ཅི་ཞུ་བ་དང་སུ་ཡི་སློབ་མ་ཡིན་ནམ། 

ལན།མཚན་ལ་བླ་ཆེན་དགོངས་པ་རབ་གསལ་ཞུ་བ་དང་། དམར་གཡོ་གཙང་གསུམ་གྱི་སློབ་མ་ཡིན།

སློབ་ཚན་བཀླགས་ཏེ་ལན་ཐོབས།

༥༽བོད་ཀྱི་དཀར་ཆག་ལྡན་དཀར་མ་ཞེས་པ་ཇི་ལྟར་བྱུང་ངམ། 

ལན། ཆོས་རྒྱལ་ཁྲི་སྲོང་ལྡེ་བཙན་གྱི་སྐབས་སུ་ཕོ་བྲང་ལྡན་དཀར་ན་བཞུགས་པའི་སྒྲ་བསྒྱུར་ཀ་བ་དཔལ་བརྩེགས་དང་། ཀླུའི་དབང་པོ་ལ་སོགས་པས་འཚལ་གྱི་གཞུང་གི་མཚན་བྱང་བཅོས་ཏེ་དཀར་ཆག་ཏུ་བྲིས་པ་ལ་དཀར་ཆག་ལྡན་དཀར་མ་ཟེར།

༦༽ སྒྲ་སྦྱོར་བམ་གཉིས་རྒྱལ་པོ་སུའི་སྐབས་བསྒྲིགས་པ་དང་ནང་དོན་གང་ཡིན་ནམ། 

ལན། བོད་རྒྱལ་ཁྲི་གཙུག་ལྡེ་བཙན་རལ་པ་ཅན་གྱི་དུས་སུ་བསྒྲིགས། སྐད་གསར་བཅད་གཉིས་པ་གཏན་ལ་ཕབ་པའི་སྐད་གཉིས་ཤན་སྦྱར་གྱི་ཚིག་མཛོད་ཅིག་ཡིན།

༧༽སྐྱིད་པའི་གདུང་རབས་ཕྱེད་དང་བཅུ་གསུམ་ཞེས་པ་གྲངས་འདྲེན་བྲིས། 

ལན། དེ་དག་གི་གྲངས་འདྲེན་ནི། ༡) ལྷ་ཐོ་ཐོ་རི་གཉའ་བཙན། ༢)ཁྲི་གཉན་གཟུངས་བཙན། ༣)འབྲོང་གཉའ་ལྡེའུ་བཙན། ༤)སྟག་རི་གཉན་གཟིགས།༥)གནམ་རི་སྲོང་བཙན། ༦)སྲོང་བཙན་སྒམ་པོ། ༧)མང་སྲོང་མང་བཙན། ༨)འདུས་སྲོང་མང་རྗེ། ༩)ཁྲི་ལྡེ་གཙུག་བརྟན་ནམ་མེས་ཨག་ཚོམ། ༡༠)ཁྲི་སྲོང་ལྡེའུ་བཙན། ༡༡)མུ་ནེ་བཙན་པོ། ༡༢) ཁྲི་ལྡེ་སྲོང་བཙན་སད་ན་ལེགས་འཇིང་ཡོན། ༡༣)ཁྲི་གཙུག་ལྡེ་བཙན་རལ་པ་ཅན་བཅས་སོ།

༨༽ བཙན་པོ་ཁྲི་རལ་གྱིས་བཀས་བཅད་ཆེན་པོ་གསུམ་གནང་ཡོད་པ་གང་དང་གང་ཡིན་ནམ། 

ལན།༡)བོད་དུ་གཞི་ཐམས་ཅད་ཡོད་པར་སྨྲ་བའི་སྡེ་པ་ལས་གཞན་པའི་སྡེ་པ་གཞན་འཛུགས་མི་ཆོག་པ་བཟོས། ༢)གསང་སྔགས་མ་རྒྱུད་ཀྱི་སྐོར་རྣམས་བོད་སྐད་དུ་བསྒྱུར་མི་ཆོག་པ་བཟོས། ༣) བྲེ་སྲང་སོགས་ཀྱི་ཚད་ཀྱང་རྒྱ་གར་མ་ག་དྷའི་ཚད་གཞི་དང་མཐུན་པར་གཅིག་གྱུར་བྱེད་དགོས་པ་དེ་ཡིན།

༩༽ བོད་ཀྱི་ཡི་གེའི་མིང་ཚིག་རྣམས་གཅིག་གྱུར་དང་གཏན་ཁེལ་ཇི་ལྟར་བྱུང་ངམ། ལན། རིག་གནས་ཕྱི་དར་སྐབས་རིམ་གྱིས་མིང་ཚིག་གི་འབྲི་ལུགས་རྣམས་གཅིག་མཐུན་བྱུང་བ་དང་། ཁྱད་པར་དུ་རྗེ་ཡབ་སྲས་བྱོན་པའི་སྐབས་སྔ་ཕྱི་ནས་མཁས་ཆེན་མང་དུ་བྱོན་ཞིང་རྩོམ་ལུགས་ཀྱང་བརྡ་སྤྲོད་པའི་གཞུང་དང་མཐུན་ལ་བོད་ཀྱི་སྤྱི་འགྲོས་སྐད་དང་མཐུན་ཞིང་། ཚིག་སྦྱོར་ལེགས་ལ་གོ་སླ་བ། ཤིང་པར་འབོར་ཆེན་དར་སྟབས་མིང་ཚིག་འབྲི་ལུགས་གཞི་རྩའི་ཐོག་ནས་གཅིག་གྱུར་བྱུང་།

༡༠༽ གླང་དར་མ་འུ་དམ་བཙན་པོས་ནང་པའི་ཆོས་ཇི་ལྟར་བསྣུབས་ཡོད་དམ། 

ལན། གླང་དར་མ་ཁོ་རང་བློ་རྨོངས་ཤིང་ཡོན་ཏན་མེད་པར་མ་ཟད། ཡོན་ཏན་ཅན་ལ་སྙིང་ནས་མི་དགའ་བ། ལོ་ཙཱ་བ་མང་པོ་བཀྲོངས། པཎྟིཏ་རྣམས་ས་མཐའ་བསྐྲད། རབ་བྱུང་རྣམས་ས་མཐར་བྲོས། བྲོས་མ་ཐུབ་པ་རྣམས་ཁྱིམ་སར་ཕབ། མི་ཉན་པ་རྣམས་གསད། ལ་ལ་རྟ་བཞོན་དུས་འབབ་འཛེག་བྱས་བཅུག ལ་ལ་རྔོན་རྒྱག་བཅུག བསམ་ཡས་བཤས་ར་བྱས། གཙུག་ལག་ཁང་མང་པོ་བཤིགས། དཔེ་ཆ་རྣམས་མེ་ལ་བསྲེགས། ཆུ་ལ་བསྐུར། ས་འོག་ཏུ་གནོན་པ། སྐུ་རྣམས་བཤིགས་པ་སོགས་བྱས་ནས་བསྟན་པ་བསྣུབས།

ཀ ༽ བོད་ཀྱི་མཛངས་བློན་བདུན་གྱི་གོ་རིམ་དང་མཛངས་པའི་ལས་སོགས་བྲིས།

ཨང་།	བཙན་པོའི་མཚན།	མཛངས་བློན་གྱི་མཚན།	མཛངས་པའི་ལས།
༡	པུ་དེ་གུང་རྒྱལ།	རུ་ལས་སྐྱེས	ཐོང་གཤོལ་བཟོ་བ་དང་། ཞིང་ལ་ཆུ་འདྲེན་བ་སོཊ
༢	ཨེ་ཤོ་ལེགས།	ལྷ་བུ་མགོ་དཀར།	ཞིང་ལ་དོར་ཁ་རྩིས། འབྲོག་ལ་ཐུར་རྩིས་སོགས།
༣	སྟག་རི་གཉན་གཟིགས།	ངོར་སྣང་བཙན་མང་།	བྲེ་སྲང་བཅོས། འབྲུ་མར་མཇལ་བྱེད། ཚོང་ལས།
༤	སྲོང་བཙན་སྒམ་པོ།	ཐོན་མི་སམ་བྷོ་ཊ།	བོད་ཡིག་གསར་བཟོ། མདོ་བསྟན་བསྒྱུར་བ་སོགས
༥	སྲོང་བཙན་སྒམ་པོ།	གཉགས་ཁྲི་བཟང་ཡང་སྟོན།	མཁར་བརྩིགས་ནས་གྲོང་ཁྱེར་བཅོས་བ་སོགས།
༦	ཁྲི་སྲོང་ལྡེ་བཙན།	འགོས་ཁྲི་བཟང་ཡབ་ལྷག	ཁྲིམས་ལུགས་གསར་གཏོད་སོགས།
༧	ཁྲི་སྲོང་ལྡེའུ་བཙན།	སྟག་བཙན་གདོང་གཟིགས།	ཁྱིམ་མི་རེ་ལ་རྟ་མཛོ་བ་གསུམ་ཆ་སྙོམས་བགོས།

གཤམ་གསལ་བཙན་པོ་སོ་སོའི་བླ་སྨན་པ་སུ་ཡིན་ཁ་སྐོངས།

ཨང་།	བཙན་པོའི་མཚན།	བླ་སྨན་པའི་མཚན།
༡	ལྷ་ཐོ་ཐོ་རི་གཉན་བཙན།	དུང་གི་ཐོར་ཅོག
༢	གནམ་རི་སྲོང་བཙན།	བློ་གྲོས་རྒྱལ་མཛོད།
༣	སྲོང་བཙན་སྒམ་པོ།	བློ་གྲོས་བཤེས་གཉེན།
༤	གུང་རི་གུང་བཙན།	འདྲེ་རྗེ་བཛྲ།
༥	མང་སྲོང་མང་བཙན།	འདྲེ་རྗེ་བཛྲ།
༦	འདུས་སྲོང་མང་རྗེ།	ཁྱུང་བོ་རྡོ་རྗེ།
༧	མེས་ཨག་ཚོམ།	གཡུ་ཐོག་ཡོན་ཏན་མགོན་པོ
༨	ཁྲི་སྲོང་ལྡེ་བཙན།	གཡུ་ཐོག་ཡོན་ཏན་མགོན་པོ་སྔ་མ།
༩	མུ་ནེ་བཙན་པོ།	འབུམ་སེང།དཔལ་འབུམ།དགའ་དགའ་གསུམ་གྱིས་སྨན་བླ་བྱས

སློབ་ཚན་བདུན་པའི་དྲི་བ་དང་དྲི་ལན།

༡༽ ཅི་འདྲ་ཞིག་ལ་གན་རྒྱའི་ཡི་གེ་ཟེར་བ་ཡིན་ནམ། 

ལན།ལས་ཁུངས་དང་མི་སྒེར་ཕན་ཚུན་བར་ལས་དོན་གང་རུང་ཞིག་ལེགས་པར་བསྒྲུབ་ཆེད་ཕན་ཚུན་གཉིས་མོས་ཀྱི་ལམ་ནས། ཕྱོགས་སོ་སོའི་ཁེ་དབང་དང་འོས་འགན་བརྩི་སྲུང་གྲོས་མཐུན་བྱུང་བའི་ཚད་འཛིན་ཡི་གེ་ལ་ཟེར།

༢༽ གན་རྒྱའི་ཡི་གེ་འབྲི་བར་ཆ་རྐྱེན་གང་དག་ཚང་དགོས་སམ། 

ལན། གན་རྒྱ་གང་ཡིན་མཚོན་པའི་ཁ་བྱང་། གན་རྒྱ་འཇོག་མཁན་གྱི་མཚན། གན་རྒྱའི་གནད་དོན་དངོས། དུས་ཚོད་དང་གན་རྒྱ་འཇོག་མཁན་གྱི་མཚན་རྟགས་( ཁག་ཐེག་ཡོད་ན་མིང་དང་མཚན་རྟགས) བཅས་དགོས།

༣༽ ཚོགས་པ་སོགས་ཕན་ཚུན་བར་གན་རྒྱ་འཇོག་དགོས་དོན་གང་ཡིན་ནམ། 

ལན། ཕྱོགས་གཉིས་ཀའི་ལས་དོན་ལམ་ལྷོམ་དང་ཁེ་དབང་གཏན་འཁེལ་བྱས་རྒྱུའི་ཆེད་དུ་ཡིན།